நெருக்கடிக்கு மத்தியில் உணவு பாதுகாப்பை உறுதி செய்தல்: சம்மாந்துறையில் "இசுரு ஹெனன யலக்" தேசிய விழிப்புணர்வு நிகழ்வு!

செய்தி - சம்மாந்துறை அன்சார்.

நாட்டில் ஏற்பட்டுள்ள நெருக்கடியான சூழலுக்கு மத்தியில் உணவு பாதுகாப்பை உறுதி செய்வதை நோக்கமாகக் கொண்டு, "இசுரு ஹெனன யலக்" (Isuru Genena Yalak) தேசிய நிகழ்ச்சித் திட்டத்தின் கீழுள்ள விழிப்புணர்வூட்டல் நிகழ்வொன்று சம்மாந்துறையில் வெகுவிமரிசையாக நடத்தப்பட்டுள்ளது. சம்மாந்துறை விவசாய போதனாசிரியர் பிரிவில் உள்ள விவசாயிகளுக்கான இந்நாடளாவிய ரீதியிலான விழிப்புணர்வு முகாம், கடந்த 04.06.2026 அன்று சம்மாந்துறை விவசாய விரிவாக்க நிலையத்தில் இடம்பெற்றது.

அம்பாரை மாவட்ட மாகாண விவசாய திணைக்களத்தின் பிரதி விவசாய பணிப்பாளர் D.M.S.B. திஸ்ஸநாயக அவர்களின் வழிகாட்டுதலுக்கு இணங்க, சம்மாந்துறை (மேற்கு) விவசாய போதனாசிரியர் MH. முர்ஷிதா ஷிரீன் தலைமையில் இந்நிகழ்வு ஒருங்கிணைக்கப்பட்டிருந்தது. இதில் சம்மாந்துறை விவசாய போதனாசிரியர் பிரிவின் விவசாய தொழில்நுட்ப உதவியாளர் R. ரஜிரேகா மற்றும் நெற்செய்கையில் ஈடுபடும் பெருந்திரளான விவசாயிகளும் கலந்துகொண்டனர்.

திட்டத்தின் பின்னணியும் முக்கியத்துவமும்.

தற்போது உலகளாவிய ரீதியிலும் உள்நாட்டிலும் ஏற்பட்டுள்ள நெருக்கடி நிலைமைகளுக்கு மத்தியில், எரிபொருள், உரம் மற்றும் ஏனைய விவசாய உள்ளீடுகளின் விலை உயர்விற்குப் பொருத்தமான மாற்று நடைமுறைகளை விவசாயிகளுக்கு அறிமுகப்படுத்துவதே இத்திட்டத்தின் பிரதான நோக்கமாகும். கடந்த மே மாதம் 13 ஆம் திகதி உத்தியோகபூர்வமாக இலங்கையில் ஆரம்பித்து வைக்கப்பட்ட இந்த "இசுரு ஹெனன யலக்" திட்டத்தின் ஊடாக, நாடு முழுவதிலும் உள்ள நெற்செய்கையாளர்களுக்குத் தொடர்ச்சியாக விழிப்புணர்வுகள் வழங்கப்பட்டு வருகின்றன.

உள்ளீடுகளைக் குறைத்து விளைச்சலை அதிகரிக்கும் வழிகள்.

இந்த விழிப்புணர்வு நிகழ்வில், குறைந்த உள்ளீடுகளைப் பயன்படுத்தி எவ்வாறு அதிகளவான நெல் விளைச்சலைப் பெறலாம் என்பது குறித்து விவசாயிகளுக்கு விரிவாகக் கற்றுத்தரப்பட்டது. குறிப்பாக, ஒருங்கிணைந்த பீடைக் கட்டுப்பாட்டு முறைகளைக் கையாளுதல், மண் பரிசோதனைகளை மேற்கொண்டு அதற்கேற்ப துல்லியமாக உரமிடுதல் மற்றும் இலை நிறக் குறியீட்டைப் (Leaf Color Chart) பயன்படுத்தித் தேவையான அளவு மட்டும் உரத்தைப் பயன்படுத்துதல் போன்ற நவீன உத்திகள் இதன்போது தெளிவுபடுத்தப்பட்டன.

அத்துடன், இரசாயன உரங்களுக்குக் குறைந்த உணர்திறனைக் கொண்ட, அதேவேளை அதிக விளைச்சலைத் தரக்கூடிய நெல் இனங்களான Bg 300, 304, 358, 366, 377/2, At 362, 303, 306, 401, Bw 363 போன்ற இனங்களை நடுகை செய்யுமாறு விவசாயிகளுக்கு ஆலோசனை வழங்கப்பட்டது. நவீன தொழில்நுட்ப இயந்திரங்களைப் பயன்படுத்துவதன் மூலம் உற்பத்திச் செலவை எவ்வாறு கணிசமாகக் குறைக்கலாம் என்பதும் இங்கு சுட்டிக்காட்டப்பட்டது.

 மாற்றுப் பயிர்ச்செய்கையும் இறக்குமதி குறைப்பும்.

நாட்டின் இறக்குமதிச் செலவைக் குறைத்து, சுயசார்புப் பொருளாதாரத்தைக் கட்டியெழுப்பும் நோக்கில் மாற்று உற்பத்திகளை ஊக்குவிப்பது குறித்தும் இதன்போது கலந்துரையாடப்பட்டது. இதன்படி பயறு, கௌபி, மிளகாய் மற்றும் வெங்காயம் போன்ற பயிர்களை நெற்செய்கைக்குப் புறம்பாக வளர்ப்பதற்கான ஆலோசனைகள் வழங்கப்பட்டன. பூச்சிக்கொல்லிப் பயன்பாட்டைக் குறைத்து, அதற்கு மாற்றாக உயிரியல் பூச்சிக் கட்டுப்பாட்டு முறைகளை (Biological Pest Control) அறிமுகப்படுத்துவது பற்றியும் விரிவாகக் கற்பிக்கப்பட்டது.

மேலும், கிராமப்புறங்களில் உள்ளூர் நுகர்வை அதிகரிப்பதற்காகச் சிவப்பு வெங்காய உற்பத்தியை ஊக்குவித்தல் மற்றும் வீட்டுத் தோட்ட அடிப்படையில் மிளகாய் உற்பத்தியைப் பொதிகளில் (Grow Bags) வெற்றிகரமாக மேற்கொள்வதற்கான அத்தியாவசிய ஆலோசனைகளும் விவசாயிகளுக்கு வழங்கப்பட்டன.

பரசூட் முறை நடுகை தொழில்நுட்பம்.

இந்நிகழ்வின் சிறப்பம்சமாக, நவீன விவசாய நடைமுறைகளை அறிமுகம் செய்யும் நோக்கில், நெற்செய்கையில் அதிக லாபம் தரக்கூடிய "பரசூட் முறை" (Parachute Method) மூலம் நெல் நாற்று நடுகை செய்வது தொடர்பான விழிப்புணர்வு மற்றும் செயல்முறை விளக்கம் அளிக்கப்பட்டது. சம்மாந்துறை விவசாய போதனாசிரியர் MH. முர்ஷிதா ஷிரீன் அவர்களினால் வழங்கப்பட்ட இந்த விளக்கக்காட்சி, உற்பத்திச் செலவைக் குறைத்து விளைச்சலை அதிகரிக்க விரும்பும் சம்மாந்துறை விவசாயிகளுக்குப் பெரிதும் பயனுள்ளதாக அமைந்திருந்தமை குறிப்பிடத்தக்கது.